Dollara tələbatın artması hansı faktorlarla bağlıdır?

Uzun müddətdir ki, dollar qarşısında dəyər itirməyən və sabit qalan manatın dəyərinin bir qədər ucuzlaşacağına dair müxtəlif fikirlər səslənməkdədir. Əsas etibarilə də dollara olan tələbatın artması fonunda belə bir proqnoz irəli sürülür. Bir çoxları iddia edir ki, son aylarda dollara tələbatın artması onun yenidən manat qarşısında bahalaşacağının anonsudur.

Zafertv.az-ın xəbərinə görə, Milli Məclisin deputatı Vüqar Bayramov da deyib ki, valyuta hərraclarında dollara tələbin yenidən artması müşahidə olunur. Onun sözlərinə görə, son 3 hərracda 241.1 milyon dollar satılıb: “Digər tərəfdən, son 3 hərracda hər satış əvvəlkindən daha çox olub. Əgər noyabrın 28-də keçirilən hərracda 68.2 milyon dollarlıq tələb yaranmışdırsa, ötən ayın son günündə 77.8, dünən isə 95.1 milyon dollarlıq sifariş olub”. Deputat qeyd edib ki, dollara tələbin artması daha çox mövsümi faktorlar ilə bağlıdır: “Belə ki, dekabrda həm biznesin, həm də vətəndaşların xarici valyuta tələbi yüksəlir.

Öncədən proqnozlaşdırıldığı kimi, dekabrda dollara tələbin artması gözlənilən idi. Belə ki, dövlət və özəl müəssisələrin və eləcə də bankların xarici borc öhdəlikləri üçün cari maliyyə ilində son ayın olması, idxalın artması, bayramlar ilə bağlı olaraq xarici səfərlərin çoxalması dollara tələbi artırır”.

Dollara tələbin artması kontekstində manatın məzənnəsinin necə dəyişməsinə gəldikdə isə, millət vəkilinin sözlərinə görə, Azərbaycanda hələ ki, üzən məzənnə rejiminə keçirilməyib: “Praktiki olaraq, manatın məzənnəsi birbaşa Azərbaycan Mərkəzi Bankının qərarlarından asılıdır. Mərkəzi Bank prosesə birbaşa intervensiya etmək imkanlarını qoruyub saxlayır. Ona görə də gələn il manatın məzənnəsinin necə dəyişməsi birbaşa Azərbaycan Mərkəzi Bankının mövqeyindən asılı olacaq”.